Hej alle
Tænker at i lige skal have min oversættelse af historien.
Mon google kan gøre det MØJ bedre
Det æ altså om kowen. Kowen æ en husdyr, men dæn kommer åss ujen for æ hus, å dæn løwer særlig å æ land. Dæn kommer åss ind te æ bøj, men det er kuns når dæn ska dø, men det æ æt nøj dæn sjæl bestemmer. Dæn går ude hile året, untawen det ti, hvor dæn stoer ind i æ stald.
Kowen har syv sider, dæn øver side, dæn neje side, dæn forre side, dæn bagge side, dæn jen side, dæn ån side og a innerside.
Å dæn forre side sæjer a huer og det hår’en for te at hornen ka ha nøj å sæj fast å. A horn er kuns te pønt, de ka æt bevæg sæ, men det ka ørerne, di sæjjer oss å æ huer li ve sidæn a æ hornene.
Foran på huer sæjjer to kowøvn. A kow si mund, kaldes en mul, det æ nok fordi dæn sæjer muh.
Å dæn bagge side sæjjer halen, dæn bruwer’en te a jav flover væk mæ, så di æ ska fal nier i æ mjælk å drown.
Å dæn øver side å dæn jen side o å dæn ån side æ der kuns hoer, det kaldes kowhoer, å de altid sam farve som kowen sjæl.
Dæn næje side å kowen æ dæn vintigst for djer hænger mjælken, å når malkpigen lukker op for æ hanner så løwer mjælken ud. Når det torner blywer mjælken suer, mæn hvordæn dæn blywer det hår a æt lær endno.
Kowen hår fier bjen, jen i hvær hjøn, De hier kowbjen, å ka bruwes te å træk søm u mæ.
Kowen spiser æ ret møj, mæn når te dæn spiser gjør’en et te gjengæld tow gång.
De fied kyer lawer tykmjælk, å når de foer kjerner, lawer de kjernemjælk.
Når kowen hår dårli maw lawer en vost, i æ vost æ der hvoller, men hvordan dæn lawer dem, har a æ lært endno.
Når kowen blywer gammel å dør, så slawter man dæn å sæller dæn tæ høje priser, men hvordan man gjør det, håer a æ lært endno.
Om dæn indvend side å kowen ve a kun, te djer blywer mjælken lawet. Noven kyer håer en klok om æ hals sodæn vier di når æ mjælk æ færdi.
Kowen hår en goe løjtsans, man ka løjt’en lånt væk – det æ det, der gier frisk luvt ud å æ land.
Kowens hvalp hier kall, hvis det æ pijer hier di kvæjer. Kallens fåer hier okse, å det gjør kowens mand åss. Oksen lawer æ mjælk å æ dirfor ingen pattedyr.
Dæn alminlidst kow-sygdom hier kolera, å hvis det æ en hunkow som hår’et hier’et kolorine.
Manden som fanger kowen hier kowfanger, dær er åss en kowfanger foran å æ biler, men det æ en åen slaw.
Når der er mier en ott kyer sammen hier’et en koloni.
Noven kyer graver sæ nier i æ juer, de hier gravkyer å di løwer mest i æ bøjer.
Der æ åss noj der hier billiard-kyer og biograf-kyer å lyntog-kyer, men de kyer som a holler så møj å, det æ dem rijti kyer, å di løwer deruj å æ land.
A hår åss høer te at kowen laver kow-kager, men dem håer a æ smavt endno.